Изложбата на плакати ,,IMposter 2”, е дел од манифестацијата ,,Нов културен бран” и ќе биде отворена во сабота, 22 септември во изложбениот салон при Дом на култура ,,Тошо Арсов‘‘ – Виница во 19:00 ч.
Изложбата опфаќа 40 плакати со кои авторката на изложбата, Маријана Иванова, има земано учество на бројни престижни интернационални конкурси и изложби во 20 земји во светот. Дел од нив се плакати изработени за време на магистарските студии во Националната Ликовна Академија во Софија, Бугарија, под менторство на проф. Иван Газдов и асистент Ненко Атанасов. “Плакатите на Маријана се смели, искрени и ја поттикнуваат публиката да сочувствува. Оставаат впечаток со своите влијателни пораки и јасниот авторски став. Преку нив гледачот станува сомисленик со глобалните социјални, културни, политички и универзални проблеми и емоционално ги споделува гледните точки на авторката. Творбите на Маријана се доживување кое останува во сознанието на публиката, а во нив е вложена творечка енергија способна да го промени светот на подобро.
Општовалидна константа е дека денешната цивилизација има потреба од плакатот како социјален феномен, а тој како универзална уметност има потреба од уметник како Маријана Иванова. Современа, образована и веќе просветена во овој вид уметност, таа не само што решително поставува глобални прашања туку и се осмелува да понуди неедноставни одговори, притоа со една атрактивна и свежа младешка објективност. За Маријана плакатот е визуелна панацеја од која нашето општество има забележителна потреба, или како што таа умешно ја посочува неговата основна дијагноза – незнаењето.
Шпалирот од меѓународни учевства и награди на еминентни фестивали и конкурси, публикациите во престижни каталози и селекциите на кои авторката дефилира, убедливо го потврдуваат горенапишаното. Сепак, има нешто што е поважно од постигнатите успеси и признанија, а тоа е љубовта на Маријана кон плакатот и нејзината длабока вера во неговата уникатна сила да ги остварува мечтите и да го поттикнува човештвото кон подем.”
-изјави д-р Ненко Атанасов од катедра ,,Плакат и визуелна комуникација” Национална Ликовна Академија Софија.
Маријана Иванова е уметник и графички дизајнер, родена на 14.06.1994г. Завршува гимназија во СОУ,,Ванчо Прке’’ – Виница во 2013 година. Го завршува своето високо образование во Националната Ликовна Академија во Софија, Бугарија, отсек – плакат и визуелни комуникации (2017) во класата на професор Георги Јанков. Во моментот е на магистарски студии – отсек плакат во истата институција во класата на истакнатиот бугарски уметник проф. Иван Газдов. Работи во областа на графичкиот и рекламниот дизајн, дизајн на плакати, книги, лого, илустрации, цртање, сликање…
САМОСТОЈНИ ИЗЛОЖБИ:
2018 (31 Август) – Алтернативен настан ,,Реанимација‘‘ – Виница, Македонија 2018 (2 Март) – ,,IMposter” во НУЦК ,,Бели Мугри‘‘ – Кочани, Македонија 2017 (4 Ноември) – ,,IMposter” во Дом на култура ,,Тошо Арсов’’ – Виница, Македонија.
Има учествувано на 66 групни изложби во 20 земји во светот, од кои 28 се интернационални изложби од конкурси за плакат, селектирани од врвни светски плакатисти и графички дизајнери. | Македонија | Бугарија | Турција | Италија | ВеликаБританија |Иран | Лихтенштајн | Австрија | Русија | Полска | Мексико |Мичиген, САД | Јамајка | Тајван | Украина | Казахстан | Германија | Орегон, САД | Кина | Словачка.
Добитник е на 4 награди: 2012 – ВТОРА НАГРАДА на„V МЛАДИНСКИ ПРОЛЕТЕН САЛОН“ – (Национална Галерија на Македонија, Чифте Амам), Скопје, Македонија 2017 – ВТОРА НАГРАДА на конкурсот за плакат на тема ,,70 години Димитровград. Првите 70 како почеток.‘‘ – Димитровград, Бугарија 2018 – ПРВА НАГРАДА конкурсот за плакат ,,Работа во 2030г.” – Потсдам, Германија 2018 – Пофална награда на конкурсот ,,Идентичност на симболи и бои‘‘ соработка меѓу НХА – Софија и Академијата за убави уметности Брера – Милано, Италија – Софија, Бугарија
Има соработувано со многу локални институции и здруженија по повод изработка на рекламни дизајни за настани, меѓу кои: Дом на култура ,,Тошо Арсов‘‘ – Виница, Музеј ,,Теракота‘‘ – Виница, Мултимедијален фестивал ,,Слободна зона‘‘ , Здружение на уметници ,,УМ‘‘ – Виница, Општина Виница, Студио “Space & I”, Здружение ,,Психеско‘‘…
