На социјалните мрежи врие по најавата на поранешниот потпретседател на ВМРО-ДПМНЕ и актуелен градоначалник на Кавадарци Митко Јанчев дека ќе организира протест пред штабот на ВМРО-ДПМНЕ за соборување на Христијан Мицкоски од претседателската функција во опозициската партија.
Овој протест можеше да биде своевиден контра-протест на локалната власт од Кавадарци против опозицијата која пак организира протести за соборување на штетната ненародна власт на Зоран Заев и СДСМ, за што претходно пишав свој текст, но ете поради ИКС причини истиот е одложен на неодредено.
Сепак поедини структури на социјалните мрежи ја најавија можноста за одржување на ОНЛАЈН протест на Митко Јанчев со кој би можел да го зададе решавачкиот удар на претседателот на опозиционата ВМРО-ДПМНЕ.
Ваквиот онлајн протест секако би бил според препораките и стандардите на Венко Филипче и владата на најубавиот премиер Зоран Заев. Така со онлајн протестот ќе се заштитат еколошките стандарди во центарот на Скопје во врска со амбиенталниот воздух и ќе се постигне соодветното ниво на тишина која е потребна за зимскиот сон на Петре Шилегов.
Онлајн протестот дури би можел да биде организиран со помош на најсовремената онлајн алатка за протестирање од дома, изработена од Министерката за образование Мила Царовска, во најкус можен рок речиси за без пари.
Онлајн протестот најверојатно ќе биде поддржан од бројните командоски одреди на Шарената револуција, во име на граѓанскиот активизам, а свое приклучување на протестот ќе имаат и сопствениците на тренираните магариња како соодветна коњаница за да долеат бензин (од тој поефтиниот) во жарот на протестирањето.
Осветлување на платото пред палатата Христо Татарчев секако за онлајн протест нема да треба, па така организаторот ќе ја зафркне Регулаторната комисија за енергетика, да не може да се богатат државните фирми на грбот на сиромаштијата на граѓаните кои протестираат.
За онлајн протестот да биде како што треба, веројатно ќе се погрижат плејадата херои- лајкувачи од непартизираната администрација кои барем толку можат да сторат да му се заблагодарат на премиерот за неговите залагања да се вратат младите од странство и да се вработат на државни јасли.
Каков расплет ќе има оваа своевидна политичка кризна состојба која се одразува директно врз квалитетот на животот на граѓаните останува да видиме.
Само се надевам дека процесот на дестилација на ракија во Кавадарци нема да трпи поради ваквото можно онлајн протестирање во услови кога во кавадаречко наголемо се вари ракија. И едно е сигурно:
Во ВМРО-ДПМНЕ најверојатно не се доволно подготвени за справување со последиците од еден ваков онлајн протест во кој Митко Јанчев би ја покажал целокупната своја моќ и доминација да го замени Мицкоски, такашто едно вакво идејно решение слободно може да се операционализира.
Со онлајн протестот на Митко Јанчев и Александар Пандов ќе се најде во мат позиција.
Пишува: Кирчо Анастасов
