“-Кога ќе ја почувствувате болката како експлозија, прибери ги сите свои приказни, целата дисторзија, внатре во твојата слабост е твојата светлина….”
Со овие стихови Наташа Миха го започнува лирското патување на бранот наречен светлина преточен во едно можеби мало музичко дело, но дело кое веруваме дека е гласник на една поголема слика што допрва ќе биде исцртана.
Новиот сингл на Македонскиот прогресивен рок бенд Station: Innermost објавен на Јутјуб претставува речиси класична музичка целина во она што меѓу огромната светска фан публика е познато како прогресивен рок.
Хармонијата и скокливото пицикато на одредени делници ја прават песната препознатлива и лесно приемчива, но и уникатна и автентична. Се гледа во авторскиот дел на музиката вистинска зрелост и големина на креативниот раскош на авторите. Уиграноста и интерференцијата на двете гитари на младиот (на години) Петановски и директноста и прецисноста на Дамир Пух, во звукот на песната чинат та да добие своевидна мултидимензионалност од која на моменти извира препознатливата балканска и Македонска ритмика.
Бас линијата потпрена со искршениот ударен капацитет на тапаните непретенциозно ја комплетираат оваа слика на длабочина и височина истовремено.
Секако вокалот на Наташа претставува своевидна круна на овој раскош кој вреди да биде слушнат.
Искрено се надеваме дека многу скоро ќе слушнеме и видиме многу нови работи од овој музички состав кој има потенцијал да ги пробие бариерите на државни граници на глобално ниво.
Топла препорака упатуваме до бендот на ова нивно патешествие кое што доаѓа да останат доследни на својот извор и својата основна инспирација која може да се слушне во ова нивно музичко дело.
Промоцијата на песната и видео записот беше реализирана во култното скопско рок кафуле Маракана на 23 Јануари, онака како што доликува на еден ваков робустен рок состав- со жив настап пред присутните поддржувачи и гости.
