Одбележувањето на датумите кои имаат големо значење за средината во која живееме, тешката историја, како и емоцијата која ја носат и ја поттикнуваат кај луѓето, отсекогаш претставувало поттик за организирање на разни културни настани, манифестации и други културни одбележувања за ЈОУ Библиотека „Ванчо Прке“- Виница. Оваа година ЈОУ Библиотека „Ванчо Прке“- Виница со низа културни настани го одбележува 23 Април- Светскиот ден на книгата и авторското право.
По тој повод Библиотеката распиша литературен конкурс на кој учениците можеа да пишуваат во три категории во зависност од нивната возраст.
Учениците од второ до петто одделение пишуваа на тема: „Со книгата патувам низ целиот свет“.
Учениците од шесто до деветто одделение пишуваа на тема: „Не ја мери книгата по тежината- туку по содржината“.
Учениците пак од средното образование пишуваа на тема: „Секој човек и секоја книга се посебна приказна“.
Комисијата формирана од директорот на Библиотеката Трајче Николов ги разгледа творбите кои пристигнаа во голем број и на најдобрите им додели Дипломи за освоено Прво, Второ и Трето место за секоја од категориите. На менторите на учениците исто така им беа доделени Дипломи за нивниот ангажман.
На пригодната програма која се одржа на ден 31.05.2018г. во просториите на Библиотеката Директорот Трајче Николов на наградените ученици им додели награди во книги. Учесниците и присутните граѓани и ученици потоа присуствуваа и на коктел организиран од Установата.
