Божикните пости, кои го најавуваат раѓањето на Исус Христос, започнуваат денес, 28 ноември, и ќе траат до 6-ти јануари 2019 година.
Во овој период верниците кои постат се воздржуваат од мрсна храна, се воздржуваат од сите телесни задоволства и се посветуваат на Бога. Во божиќните пости е дозволено да се јаде риба. Во постењето има и правила, сите не постат исто, постојат категории во самиот пост како: мали деца, изнемоштени, болни лица, бремени жени, постат според нивните телесни сили, според препораки на духовно лице, кое може и целосно да ги ослободи од пост. “ Основата врз која се појавил Божикниот пост бил постот спроти празникот Богојавление, кој во Црквата се празнува од III век, а во IV век бил поделен на празниците Рождество Христово и Крштение Господово. Божикниот пост започнува на 15/28 ноември и трае до 25 декември/7 јануари, односно 40 денови, поради што во Типиконот, како и Великиот пост, се нарекува Четириесетница.
По зборовите на блажен Симеон Солунски, „постот на Божикната Четириесетница го изобразува постот на Мојсеј, кој откако постел 40 денови и 40 ноќи, ги добил на камени табли Божјите заповеди. А ние, постејќи 40 денови, го созерцуваме и го примаме живото Слово од Дева, изобразено не на камења, туку воплотено и родено, и се приопштуваме на Неговата Божествена плот“. Божикниот пост е установен за да се очистиме за денот на Рождеството Христово преку покајание, молитва и пост, за со чисто срце, душа и тело да можеме благоговејно да Го сретнеме Божјиот Син, Кој дојде во светот и за Нему да Му го принесеме нашето чисто срце и решеност да го следиме Неговото учење.” – пишува во посланието за Божикниот пост на Македонската православна црква.
