Професорот на Факултетот за драмски уметности Златко Славенски денеска почина ненадејно во својата 53 година.
Смртта уследила откако на час на факултетот на професорот му се слошило за време на предавања, соопштуваат извори од факултетот.
Шекспир, Гете, Пинтер, Горан Стефановски, Сашко Насев, Венко Андоновски. се авторите кои кај режисерот Златко Славенски го хранеа неговото уметничко кредо и авторски потенцијал за режирање.
„Соларис“, „Супернова“, „Папокот на светот“, „Бесови“, „Сината птица“, „Амадеус“, „Розенкранц и Гилденстерн“ се дел од неговите најблескави претстави кои тој како режисер ги има оствањено.
Неговиот специфичен и моќен уметнички дух пленеше со неговата дискусија која не ретко навлегуваше во најдлабоките пори на општествените прилики на овие простори.
Голем број актери веднаш по оваа тажна вест се одзваа со своја реакција на почит кон неповторливиот професор и режисер:
Денес не напушти уште едно големо име на нашиот театар. Златко Славенски. Режисер и професор. Ретко добар човек и голем интелектуалец меѓу режисерите. Со него секој разговор беше длабока инспирација, а секоја соработка вонредно задоволство и уживање. Му благодарам за пријателството, укажаната доверба и провокативните актерски предизвици. Велеше дека сé e светлина, а сите ние остатоци од ѕвездите кои веќе не постојат. Нека му е вечна светлината и ѕвезден трагот кој го остави!
-напиша на фејсбук по повод оваа тажна пригода актерот Васил Зафирчев.
Актерот Тони Михајловски на свој специфичен начин му заблагодари на неговиот ментор и уметнички заштитник во времињата кога имало хајка против актерот:
Златко Славенски. За мене најбитниот режисер во Македонија, и мојот актерски живот. Единствениот режисер кој ме ангажираше во 16те години незапосленост. Единствениот кој имаше храброст да се спротивстави на директорите во намерата да ме ампутираат од театарот. “Будење на пролетта”, “Пер Гинт”, “Папокот на светот”. Не ја завршивме мојата магистерска во која требаше да ми биде ментор.
Почивај во мир другар мој. Нека ти е мирен и светол патот.
-напиша Тони Михајловски на фејсбук.
За дел од уметничкиот и воопшто човечки портрет на Златко погледнете во видео портретот на Македонската телевизија во продолжение:
