Под раководство на Повардарскиот митрополиот, Неговото Високо Преосвештенство Агатангел вчера Повардарската епархија со бележит пиетет го прослави еден од најголемите Православни христијански празници Успение на Пресвета Богородица.
Второто Воскресение како што го нарекуваат верниците во христијанскиот свет, во црквата која го носи името на овој светол празник беше одбележано со голема љубов и масовност на Велешани кои присуствуваа на светата Божествена литургија со која чиноначелствуваше Митрополитот Агатангел.
Во продолжение го пренесуваме соопштението упатено до јавноста од страна на Повардарската епархија:
На празникот на Успението на Пресвета Богородица или како што уште го нарекуваме и Второ Воскресение, македонскиот народ повторно силно ја демонстрираше својата силна православна вера, својот вистински православен христијански дух, посетувајќи ги масовно храмовите низ целата држава, поклонувајќи се и просејќи благослов од Мајката Божја за застапништво пред престолот на Севишниот Бог.
Недогледна колона од луѓе пред храмот на Успението на Мајката Божја во Велес, кои смирено го чекаат својот ред за да ја целиваат плаштаницата на Пресвета Богородица, поставена во средината на храмот, големиот број на верници кои молитвено го очекуваат принесувањето на Светите Христови дарови за да се соединат со Христос, велелепните и ангелски звуци на црковните хорови се моментите кои го одбележуваат овој прекрасен ден во градот Велес.
Централниот настан на чествувањето беше Светата Божествена Литургија следниот ден со која чиноначалствуваше Неговото Високопреосвештенство, Митрополитот Повардарски г. Агатангел, во сослужение на бројно свештенство од градот Велес. На Литургијата Митрополитот Агатангел благоволи и го произведе во чин ипоѓакон, богословот Драган Тасевски од Велес.
