Градоначалникот на општина Виница Миле Петков денеска беше домаќин на официјални претставници на Европската Комисија во Скопје и вклучени лица во реализацијата на проект за обезбедување на подобри услови за домување на ромската заедница во општина Виница.
“Денес во посета на општина Виница беа Нафи Сарачини, Програмскиот менаџер во делегацијата на Европската Комисија во Скопје, Валон Мејзини(лидер на проектот), претставник на невладината ЧЕЛИМ од Италија, Крешник Ајдини менаџер на проектот и претставници од Ромскиот Ресурсен Центар и Министерството на Труд и социјална политика, на лице место да се запознаат со резултатите на проектот “Обезбедување на пристојни услови за домување за ромската заедница во општина Виница”.
Пред гостите го истакнав моето задоволство за успешно завршениот проект односно за постигнување на главната цел на проектот, а тоа е да се придонесе кон постигнување на намалување на социо-економските разлики со кои се соочуваат Ромите со лошите услови за домување и условите во кои живеат.
Со реализираните активности на проектот ги остваривме следните резултати:
– Целосно реконструирани домови на 22 куќи на социјално загрозени ромски семејства и 14 тоалети кои се дел од тие 22 куќи;
– Легализација на 80 бесправно изградени објекти/домови во сопственост на ромски семејства за кои се поднесени барања до 31.12.2018 година и обезбедени имотни листови за сопственост;
– Подобрена инфраструктурата во ромската населба преку изградба на крак на улица Македонска во износ од 1000 метри должина и истата е осветлена со 20 канделабри;
– Изградена канализација во ромската населба во должина од 500 метри, со капацитет за приклучување на 100 домакинства во канализациска мрежа;
– Набавени се 12 контенјери за собирање на отпад и истите се распоредениво ромската населба;
– Осветлена е улицата Иво Лола Рибар со поставување на 8 канделабри;
– Изградба на потпорен зид на улица Иво Лола Рибар во должина од 60 метри;
– Во фаза на изработка е ДУП за 25 хектари за блок 18 во ромската населба;
Проектот се имплементираше 32 месеци од 01 Ноември 2019 до 30 Јуни 2022 година. Вкупниот буџет на проектот изнесува 535,180.00 евра, каде што општина Виница учествуваше со 13,200.00 евра обезбедени од буџетот на општината, а останатите средства се финансирани од Европската Унија во соработка со Министерството за Труд и социјална политика.”
-информираше Миле Петков- градоначалник на општина Виница.
