По стапувањето на функцијата министерка за култура, Ирена Стефоска даде ветување дека главен приоритет во стратешките и програмските определби ќе биде заштитата на културното наследство.
Но, останаа само празни ветувања, а реалноста е иста како и со претходните три министри во овие четири години. Проектите за заштита на културното наследство воопшто не се врвен приоритет во Програмата на Министерството за култура за 2021 година.
Катастрофална е состојбата и со дејноста на заштита на аудиовизуелното наследство и одобрената годишна програма на Кинотеката на Македонија. Анализата на одобрените проекти за заштита на аудиовизуелните добра само ја потврдува оваа теза.
Буџетот за заштита на аудиовизуелни добра, односно буџетот за единствената институција која се грижи за заштита на филмското наследство, Кинотека на Македонија, континуирано се намалува и истиот во последниве четири години е намален за скоро 50%. Вкупниот буџет за програмски активности на Кинотеката на Македонија до 2016 година изнесуваше околу 10 милиони денари, а сега е само 5,6 милиони денари.
Исто така, загрижува и соодносот на доделени средства за проекти. На исто рамниште се ставени проектите за дигитализација и заштита на аудиовизуелното наследство со проектите поврзани со филмската програма на кинотечното кино. Односно, и за едните и за другите е одобрена скоро идентична сума!
Директно укажуваме дека основна и носечка дејност на Кинотеката е заштитата на аудиовизуелното наследство! Кинотеката на Македонија не е културен центар, туку единствена матична институција за заштита на филмското наследство, согласно Законот на заштита на културното наследство.
За жал, програмските определби и стратегија на актуелниот директор на Кинотеката во најголем дел се фокусирани на работата на кинотечното кино, што го потврдува крајно несериозниот и непрофесионалниот третман кон заштитата на аудиовизуелното наследство. Поразителен е фактот дека во последните три години скоро и да не е реализиран проект на реставрација и заштита.
Исто така, веќе четврта година во делот за инвестиции не се одобрува проектот за постојаната изложбена поставка. Напоменуваме дека Проектот е целосно изработен и завршени се сите административни постапки за него уште во 2016 година, а до денес не е реализиран. Затоа пак, на просторот наменет за постојана изложбена поставка, директорот со полн интензитет во време на пандемија инвестира во поставување на шанк и адаптација на истиот во угостителски објект.
За ваквиот несоодветен третман на заштитата на културното наследство бараме одговорност од членовите на комисиите при Министерството за култура кои ги одобруваат проектите без темелна и соодветна анализа. Исто така, потребна е ревизија на предложените проекти од страна на институциите, како и преиспитување на компетентноста на раководните лица кои ги креираат приоритетите и предлог проектите за годишните програми на институциите.
-фејбук реакција на Комисија за култура на ВМРО-ДПМНЕ
