Вчера на јутјуб беше објавен нов видео запис за новиот сингл “Ретки билки” на Македонскиот пост-панк андерграунд бенд Бернајс Пропаганда.
Лирскиот дел од песната гради чувство на топлина, провокација, која те тера да размислуваш, многу пошироко од сликата со маса на која се поставени животни намирници за секојдневно преживување…
Говори за заедништво “Зошто ретки билки сме…”, говори за секојдневни работи, говори за фрагментирани парадоксални слики кои како низ сон флешираат пред очите на “сонувачот”.
Искршената ритмичка подлога на песната опишува прилики на нелинеарност во експлицитни дувачки пикови на инцидентност и кратки моменти на блесок за од тој мозаик на звучност да се формира едно посебно чувство на енергија која човеек не знае како би завршила. По повторното преслушување на песната овој искршен ритам пополека наликува на пијан киклоп кој од љубопитност под своите чекори разрушува некое античко село на границите на човековата имагинација.
Во видеото е опфатена оваа навидум љубовна приказна, на бендот со слушателот обоена со боите на љубовта, низ затемнети ходници во кои главниот протагонист на видеото покроце талка низ ваквиот оплеменет лавиринт… За на крај да падне ничкум на колена и во агонија да се превртува сред тој неартикулиран ходник на безначајноста….
Но во суштина видео записот говори за помрачените лавиринти во кои егзистира Бернајс Пропаганда како гласноговорник на генерација која живее за гол егзистенцијализам разјаден од добро угоени црви.
Спотот делува атрактивно, светски, даркерски но релевантно.
Овој сингл на бендот Бернајс Пропаганда е во издание на Moonlee Records, Geeger Records Pop Depresija, Ill in the Head Records и Balkan Velik .
Синглот ќе се најде на следниот албум на бендот кој што е најавен за промоција во Септември оваа година.
Видеото е авторство на Милан Блажевски а во него настапуваат актерката Камка Тоциновски заедно со Јелена Милосављевиќ и Маја Талевска.
Зад камерата за видео записот оперираат Борис Таковски, Јосип Здравковски и Милан Блажевски.
Анимациите се на Јосип Здравковски.
Вреден музички фрагмент кој ја билда достојно атмосферата во очекување на новиот албум на бендот.
