Денеска кај автопатот Миладиновци-Штип своја прес конференција одржаа од Опозициската ВМРО-ДПМНЕ во врска со најавите на Министерот за транспорт и врски Благој Бочварски дека граѓаните ќе мора да плаќаат поскапи патарини за користење на овој автопат во иднина.
Душко Иванов од Општинскиот комитет на ВМРО-ДПМНЕ од Штип го прозва Бочварски дека тој всушност и не знае како е од свој џеб да плаќа скапа патарина како онаа што ја предвидува за граѓаните од 320 денари за патување во двата правци на релација Штип-Скопје. Иванов оваа своја теза ја базира врз тоа што додека Бочварски бил пратеник граѓаните му ги плаќале неговите патарини, па тоа продолжило кога станал градоначалник за оваа пракса да продолжи и сега кога е министер.
Целиот текст на прес конференцијата на опозициската ВМРО-ДПМНЕ во врска со оваа тема ја пренесуваме во продолжение:
“Почитувани,
Повеќе од јасно е зошто Благој Бочварски не може да разбре дека граѓаните немаат пари да ги платат скапите патарина што планираат да ги постават на автопатот Штип-Скопје.
Неговата биографија ни го потврдува тоа.
Или, поконкретно, додека беше пратеник – патарините му ги плаќаа граѓаните, додека беше градоначалник, повторно патарините беа на сметка на граѓаните, па истата „судбина“ го снајде и сега, додека е министер.
Затоа, за Бочварски е невозможно да сфати што значи 320 денари патарина до Скопје. Тој не знае како е од свој џеб, од тешко заработени пари, да издвоиш 1.500 евра на годишно ниво, за да си ги завршиш своите обврски.
Во вчерашната изјава ги слушнавме неговите ставови, кои се иронија на состојбата во која СДС ја донесе државата. И по таа логика, новиот автопат Штип – Скопје е непотребен, вишок, подобен само за богатите, а сиромашните или да си седат дома, или да се возат по необезбедени селски патишта. “
Бочварски вчера ни докажа дека само елитата е таа која има привилегии, а обичните граѓани се оставени на немилост во оваа држава!
