До крај на месец август околу 200-тини работници во приватна конфекција во Свети Николе остануваат без работа.
Станува збор за непродолжување на договорите за работа во приватна текстилна фабрика на околу 70-тина вработени, над 100-тина работници кои ќе бидат прогласени како технолошки вишок кон крајот на месец август и 20-тина луѓе кои наредните неколку недели ќе им заврши договорот за работа. Ова се околу 200 семејства кои ќе останат без основна егзистенција во Свети Николе, што за општина со население од околу 13 илјади жители е еднакво на социјална бомба во срцето на Македонија.
Градоначалникот на Свети Николе Сашо Велковски, на неполни три месеци пред избори ги кани на состанок во општината работниците кои досега останаа без работа од приватна текстилна фабрика во градот со цел за нивно повторно вработување.
На состанокот е предвидено да присуствува и советникот на Зоран Заев за труд и социјална политика Милан Живковиќ
Дали станува збор за искрена намера да им се помогне на овие наши сограѓани и кој начин и како Градоначалникот ќе им обезбедува вработување на луѓето кои останаа без работа, останува да видиме во наредниот период, со оглед на тоа што станува збор за вработување во приватниот сектор.
Во продолжение го пренесуваме тестот на соопштението на Градоначалникот на Општина Свети Николе Сашо Велковски:
“
СООПШТЕНИЕ
Се известуваат поранешните вработени во АД Мода на кои не им се продолжени договорите за работа од 01.07.2021 да дојдат на договорен состанок во големата сала на општина Свети Николе на ден 19.07.2021 година (понеделник) во 14.00 часот со цел изнаоѓање на решение за нивно повторно вработување.
На состанокот ќе присуствува советникот на премиерот за труд и социјална политка Милан Живковиќ.”
-стои во соопштението на Градоначалникот на Свети Николе.
Ваквата состојба со драстично зголемување на невработеноста во општините во Источна Македонија е негативен тренд кој пред извесно време започна во Штип а од истиот не се поштедени и останатите општини низ целиот регион. Текстилството бележи изразено негативни трендови и се заканува пропаст на целата индустрија.
