Само 440 граѓани се отселиле од земјава во првата половина на 2016-та, покажуваат официјалните податоци од Државниот завод за статистика објавени во јуни лани. Компаративно со претходните неколку години, трендот на иселување бележи пад, односно ако 2016-та имало 440, во 2015-та тој број бил 767, во 2014 година 740, во 2014 година 945 лица, а во 2012 година земјата ја напуштиле 1.330 лица.
Ваквите податоци објавени на сајтот на Статистика ја доведуваат во прашање и тезата дека во Македонија живеат само 1.500.000 гласачи. Порталот „Курир“ пишува дека објавата на Заводот ги побива и тврдењата на СДСМ дека дури 600.000 Македонци ја напуштиле земјата. Последен доказ за тоа е податокот од Статистика дека на крајот на 2016-та бројот на жители во Република Македонија изнесувал 2.073.702.
Лицитирањето со бројот на иселени беше и главен адут во предизворието за доаѓање на власт, пишува порталот. Сегашниот премиер, тогаш во опозиција, вината за ваквата состојба со населението ја префрлаше на ВМРО-ДПМНЕ и нивните политики. Во август 2015-та Заев велеше дека Груевски ја нокаутирал Македонија, а за тоа говорат 600 илјади граѓани, кои ја напуштиле Македонија, пренесува порталот.
Но овие објавени податоци на Заводот за статистика, ги побиваат сите изјави на социјалдемократите дадени последниве две години.
Бројката на непостоечки гласачи од изјава во изјава се менуваше, а тоа внесе дополнителна конфузност кај граѓаните. Најпрво проблем беше бројот на лицата со право на глас, а потоа и бројот на фантоми.
На 3-ти октомври 2016-та и ДИК потврди дека наместо 500.000 фантомски гласачи како што тврдеа социјалдемократите, споредбено со избирачкиот список во 2014-та тогаш право на глас имаа 1.783.715 лица или само 3000 лица повеќе. По проверките на ДИК се утврди дека бројот на гласачи во избирачкиот список е идентичен со бројот на гласачи во избирачкиот список пред предвремените парламентарни и претседателски избори во 2014 година.
Според последните податоци објавени од ДСЗ во Публикација посветена на миграциите, во земјава во 2016 година се доселиле 283 македонски граѓани, а во 2012 година 396 граѓани. Во рамки на внатрешните миграции во земјава, 6.869 лица мигрирале од една во друга општина.
