Продолжува едносмерното информирање на јавноста од страна на владините функционери за т.н. француски предлог со кој што според огромен број реакции во јавноста на граѓани во Македонија се подготвува бугаризација на народот и државата.
Средбите со поедини таргет групи (претставници на политички партии, одбрани граѓански организации, одбрани новинари, одбрани експерти) се одвиваат доминантно со еднонасочно информирање од страна на владините претставници, со можност за краткотрајни забелешки од страна на соговорниците на самите средби.
Ваквиот јуриш на актуелната влада предводена од Димитар Ковачевски во рок од само 2-3 дена да “дискутира” за круцијално политичко прашање од кое зависи иднината на држава во најмала мера е смешен.
Прашањето кое навлегува во европската перспектива на државата, поврзано со идентитетските обележја на Македонскиот народ не треба и не смее да биде дискутирано во ваков “блиц-криг” каков што го динимизира владата на Ковачевски.
Бројни интелектуалци, поединци, професори, стручњаци и експерти гласно се спротивставуваат на оваа т.н. бугаризација во обид на Ковачевски, Османи и Маричиќ кои се најистурените перјаници на пропагандата за прифаќање на т.н. француски предлог.
На ваквото јавно спротивставување се надоврзува и масовноста од неколку десетици илјади граѓани кои што протестираат во низа секојдневно пред зградата на владата.
Од вчера откако беше воочена сериозноста на владата да го турка процесот за прифаќање на оваа “бугаризација” на Македонија, во јавноста започнаа и јавни повици за радиклизација на противниците на овој процес кој што е во тек
Во текот на вчерашниот ден Димитар Апасиев порача дека партијата Левица ќе се радикализира за денешниот закажан протест, а на социјалните мрежи влијателни интелектуалци и граѓани исто така објавуваат повици за радикализација бидејки владата тврдоглаво останува глува на повиците на јавноста.
Радикализацијата во државата oдговара единствено на поединци во владеачката номенклатура која што ги има сите инструменти на моќ во државата за прогон и репресија на сите кои што потенцијално можеби ќе влезат во непосакувано сценарио за радикализација.
Огромниот јавен револт на целокупното граѓанско ткиво во Македонија не смее да премине во несакани правци во кои ќе страдаат поединци, но и целата држава ќе продолжи да тоне во сегашниот амбис во кој што се наоѓа- инструментализиран со намера за девастирање на Република Македонија.
Повикувам на мудрост, воздржаност и голема одговорност кај сите засегнати страни во овој наметнат од страна конфликт во внатремакедонското национално битие.
Пишува: Кирчо Анастасов
