Денеска на прес конференција Министерката за финансии Нина Групер Ангеловска соопшти дека владата ќе го отфрли предлогот на Министерот за внатрешни работи Наќе Чулев за зголемување на платата на полициските службеници за месеците април и мај за 15.000 денари.
– Секоја чест за чуварите на нашиот јавен ред и мир. Многу службени лица и во другите сектори се залагаа во овој тежик период и работеа по 16-17 часа, па и во сабота и недела. Тоа е некоректен предлог, ако се знае дека само два дена претходно министерот Чулев поднесе предлог за кратење од 88 милиони денари од трошоците на министерството, соопшти Ангеловска одговарајки на новинарско прашање на прес конференцијата.
За разлика од полицајците вработените во Центрите за јавно здравје како и сите членови на Итна медицинска помош ќе добијат 20 отсто повисока плата како награда за два месеци. Владата за ова предвиде еден милион евра, а околу 3.000 здравствени работници ќе бидат наградени заради нивниот ангажман во борбата со пандемијата. Наградени ќе бидат докторите и медицинскиот персонал на инфективните клиники, а парите ќе бидат префрлени на домашна платежна картичка.
