На брдовитиот, преубав и неспокоен Балкан повторно дуваат ветровите на нестабилност кои што можат да доведат до турбуленции. Според Брисел и Вашингтон, како резултат на војната во Украина, дојдено е времето за затворање на нерешените прашања на Балканот. ЕУ со помош на САД се надева да стави крај на македонското и српското прашање, не штета на Македонија и на Србија, а во корист на Бугарија, Косово, Црна Гора, Босна и Херцеговина. Но обидот за решавање на овие две прашања по секоја цена и на штета на македонскиот и на српскиот народ може да доведе до нови проблеми и повторно отворање на пандорината кутија на Балканот.
Западот сака по секоја цена да го интегрира Западен Балкан во евроатланските структури, се со цел да не дозволи продор на Кина, Русија и на Турција на Балканот. За Западот и за ЕУ, Балканот повторно е на линијата на огнот во геополитичката битка помеѓу Истокот и Западот, и поради тоа потребно е сега и веднаш да се решат сите проблеми на Балканот, кој што ЕУ го смета за свој двор. Во брзањето да го стори тоа, Западот е на пат да направи грешки со несогледливи последици, кои ќе се одразат на целиот Балкан.
Во однос на македонското прашање, Западот стои зад Бугарија и нејзините неразумни барања во однос на Македонија, за давање на датум за почеток на преговорите со ЕУ. И покрај сите жртви и остапки кои што Македонија ги направи во последните 30 години на штета на Македонија, како што се промената на името, на знамето, Охридскиот и Мајскиот договор, многукратното отворање и промена на Уставот, не се гледа крајот на вечниот пат на Макдонија кон ЕУ. Последниот предлог од Франција за решавање на проблемот помеѓу Бугарија и Македонија директно е на штета на Македонија и на македонскиот народ. И ќе се најде ли политичар во Македонија со достоинство да и каже на ЕУ и на Западот Доста е, Македонија даде премногу жртви и остапки, а од ЕУ не доби ништо. Погрешната политика и стратегија на Западот во однос на Македонија води до пораст на евроскептицизмот, и од ден на ден се повеќе граѓани на Македонија се против влегувањето во ЕУ, за сметка на прифаќање на барањата на Бугарија. И наместо надевањето и слепата верба дека влезот во ЕУ ќе ги реши сите проблеми на Македонија, време е новата влада да се зафати со реални и структурни реформи.
Покрај затворањето и решавањето на македонското прашање, за Западот од посебно важност е затворањето на српското прашање, на штета на Србија. Западот смета дека Србија е бунтовник, кој што тесно соработува со Русија и со Кина, и на тој начин Србија ги минира сите планови на Западот на Балканот. Како резултат на тоа, време е Србија да се казни, и да се затвори српското прашање. Пред Белград е поставен јасен ултиматум, признавање на Косово и Метохија, откажување од Република Српска, зголемување на правата на малцинствата во Србија, откажување од Српската православна црква во Црна Гора и на Косово и Метохија, како и ставање на санкции на Русија и прекинување на соработката со Русија и со НР Кина. Официјален Белград, за разлика од Скопје, го одби овој ултиматум од Западот. Како и многупати низ историјата, Белград покажа дека со него не може да се разговара со ултиматуми. Мнозинството граѓани на Србија веќе отворено се против влегувањето на Србија во ЕУ, доколку цената која што Србија треба да ја плати е признавање на Косово, откажување од Република Српска, како и ставање на санкции на Русија и откажување од соработката со Русија и со НР Кина.
Јасно е дека Западот е цврсто решен во своите намери да ги затвори овие две прашања на Балканот по секоја цена, на штета на Македонија и на Србија. Но во воздухот виси дилемата, дали доколку Западот на овој начин го пресече Гордиевиот јазол на Балканот, истиот тој нема да доведе до отворање на Пандорината кутија како многупати низ историјата. Останува времето да покаже.
Пишува: Дарко Тодоровски
Магистер по меѓународни односи и воен аналитичар
