Затоа што утре тоа можам да бидам јас, тоа можеш да бидеш ти, тоа може да биде секој граѓанин под прангите на овој хибриден режим докажан и признаен од извештаите на Фридом Хаус и угледниот Економист.
Хибридниот режим нанесува најмногу штета кога е во налет на неговата пропаст која е се поизгледна. Вештачкото држење на власта во Република Македонија од страна на Зоран Заев и неговата клиентелистичка група околу него е пред колапс. Тоа го знае Зоран Заев тоа го знаат и неговите покровители и спонзори. Парламентарното мнозинство дише на жабри! Државата тоне по сите параметри, здравството колабрира, економијата е веќе колабрирана а Македонија е изолирана држава повеќе од било кога. Слободниот проток на луѓе и економски добра е невозможен. Затворени сме како во конзерви зад границите кои што ветуваат дека ќе ги заменат со оние европските.
Оттука во одржувањето на оваа власт на “шкрги”, Зоран Заев прибегнува кон единствените методи кои што нему му се својствени а тоа е политички прогон и политички ликвидации на неговите опоненти. Помогнат од партиските медиумски мегафони на СДСМ, политичкиот терор на пресметка со неистомислениците секојдневно завзема се поголем замав.
И секако ударот на хибридниот режим е најсилен онаму од каде што доаѓа најголемата опасност за неговиот опстанок. Штом може Зоран Заев да тужи Потпретседател на опозициска партија, пораката е дека Зоран Заев и неговиот клиентелистички хибриден режим може да тужи секого во државата кој се спротивставува на неговото штетно владеење.
Зоран Заев во својство на премиер (читај најмоќниот човек во државата) својот топуз го насочи против Потпретседателот на ВМРО-ДПМНЕ Александар Николоски. Во тужбата за клевета за искажан политички став против Николоски, Зоран Заев не понуди во јавност контра аргументи со кои што би ја докажал својата “невиност” преку демант, наместо тоа прибегна да се крие зад партизираниот судски систем од каде сака да ја манифестира својата волја врз еден од предводниците на актуелната пресметка против мафијата на власта.
Наместо судско-обвинителскиот систем да го расчисти случајот “рекет” до крај инсталации на овој систем им судат на луѓето кои што изнесуваа аргументи, ставови и тези за да помогнат да се расветли овој најголем корупциски случај во историјата на современа Македонија.
Во ваковиот забревтан од паника коњанички поход на Зоран Заев против ставовите на Александар Николоски, премиерот како свој “јавач на апокалипсата” го има ангажирано еден од најскапо платените адвокати во државата за кој што опозицијата исто така во јавноста критикуваше дека е дел од непотистичка мрежа во судско-обвинителскиот систем.
Наспроти ваквата наезда на политичка пресметка покрената од Зоран Заев, Александар Николоски пред македонските судски органи се брани сам “вооружен” единствено со вистината и своите аргументи.
Утринава на закажаното судско рочиште Зоран Заев не се појави лично (веројатно од страв од незгодни прашања од новинарите) криејки се во премиерската фотелја а наместо него на рочиштето се појави неговиот адвокат. “Ликот и делото” на Зоран Заев мора да останат недирнати. Елитизмот е незгодна работа кога достигнува нови граници во битието на оние што се декларираат како соција-демократи.
На судењето Александар Николоски побара во доказите на судската постапка да влезе и изјавата на веќе осудениот Бојан Јовановски кој во рамки на процесот на негово судење изјави: „Парите од рекетот барајте ги кај Вице и Зоран Заев”.
Исто така тужениот Александар Николоски побара да се земе во целост неговата изјава за која Заев покрена тужба, а не селективно, додавајќи дека до судот е доставен само оној дел кој веројатно му одговара на тужителот.
Николоски побара и Заев како тужител да биде испрашан од страна на судот.
Рочиштето за овој процес со кој што Зоран Заев бара отштета од 60.000 денари од Потпретседателот на ВМРО-ДПМНЕ заради неговот искажан политички став е одложено за 20 ноември оваа година.
П.С. Македонија има избор! Наместо прогон на политички неистомисленици и жестока пресметка со нив, Македонија треба да се насочи кон создавање на нови вредности со кои што сите заедно ќе ја извадиме држава од калта во која длабоко е потоната. Хмммм… Развој! Што беше тоа?
Пишува: Кирчо Анастасов.
