Денеска на нашата читателска публика имаме можност да го претставиме новиот трет студиски албум на скопскиот бенд “21 Век” насловен како “Си нацртав живот”.
Васко, Дени и Раде си го “фураат” својот музички наратив таков како што го зацртаа уште со првото нивно издание насловено како и самиот бенд кој започна како проект а прерасна во една супер интересна еклектична долготрајна приказна од чија љубов се роди нивното трето целовечерно музичко издание.
Албумот се состои од 8 музички целини кои заедно го даваат мирисот на звукот на луѓето кои преживуваат и покрај се што се случува во овој испобркан свет и реалност.
Лириката повторно крепи делчиња од мозаикот на субверзивната потсвест на нејзиниот автор кој како да сака илузорните пејсажни слики да ги претвори во репрезентативна реалност која навистина вреди да се доживее. Ваквото посегнување во длабочината на сопствената свесност или потсвесност од страна на авторите како на зборовните целини така и на звучните партитури е нешто што навистина му фали на современиот Македонски и Балкански музички израз на креација и себеспознавање. А момците од 21 Век тоа најубаво го прават со што на целокупната музичка сцена и’ даваат целосно нов и ведар музички дух и занес.
Албумот “Си нацртав живот” подолго време се крчкаше низ каналите на музичките миксети, појачала и останата опрема која бендот ја има опседнато за време на снимањето на песните содржани во ова музичко дело во текот на 2020 и оваа 2021 година.
Пред објавата на албумот претходеше објава на хит-синглот “Ужасно ми фалиш”:
како и синглот “Сама види си”
Албумот „Си нацртав живот“ на 21 Век е публикуван под боите на Пасворд продакшн и е застапен на поголемите дигитални музички платформи .
ПС. Заборавивме да спомнеме дека со овој албум бендот на најубав начин го честита денешниот ден на независноста и независните.
