До македонските медиуми
Македонски Национален Совет во Швајцарија е аполитичка организација, формирана од браќа и сестри Македонци, кои Македонија ја носат во срцата. Со намера сме да делуваме во насока на она што е вистинско, чесно, праведно, чисто и достојно за слава, за Македонија, се разбира!
Мисла водилка ни е се’ што раѓа добродетел, почит, авторитет и афирмација на нашата заедничка мајка Македонија.
Не можеме да не ја почувствуваме скрбта на нашите браќа и сестри Македонци кои неуморно и несебично се борат последниве денови, а и последниве години. Тешки се нападите од сите страни, голема е неправдата која ни се нанесува, неизмерна е болката која ни се предизвикува!
Ние Македонците надвор од нашата Македонија ви се поклонуваме на вашата чест, слава и храброст, зошто неуморно се борите за македонските правдини, како што вели нашата химна! Вие браќа и сестри Македонци сте тие кои сте на браникот на слободата, вие сте тие што ги трпите најтешките удари!
Ние сме со вас и ви ја даваме нашата безрезервна поддршка.
Оти заедно сме посилни!
Како претставници на Македонскиот Национален Совет од Швајцарија, изјавуваме дека ги поддржуваме овие протести во Македонија и дека сме против прифаќање на францускиот предлог, против мешање на Бугарија во внатрешните работи на Република Македонија, против присвојување на нашата историја и негирање на нашиот македонски јазик!
Македонија пред се’!
Македонија на Македонците!
Македонски Национален Совет за Швајцарија
13.07.2022
