Градоначалникот на општина Велес Аце Коцевски како претседател на Организацискиот одбор на „Рациновите средби“ ја соопшти одлуката за доделување на Почесното Рациново признание на Дијана Влатковиќ и д-р Борјана Прошев-Оливер од Република Хрватска за Хрватско-македонскиот речник во издание на Матица на Македонците во Хрватска.
Нашата цел е Рациновите средби да ги вратиме на највисокиот пиедестал на македонската култура, да се избориме во Македонија да победат вистинските културни вредности, а не турбофолкот, шундот, сомнителната култура,
изјави Коцевски“.
Академик Луан Старова, ја соопшти одлуката на комисијата за доделување на признанието на писателот Игор Станојоски за романот „Диссомнии“ во издание на „Антолог“.
Во едногласната одлука на жирито стои:
„Авторот на овој роман покажува вешта раскажувачка стратегија, со искрена, динамична и уверлива нарација да го придобие читателот од почетокот до крајот, да го улови во комплексно книжевно четиво преполно со непредвидливи настани“.
„Победува најгласно извиканата вистина, а најчесто најгласно извикана вистина е онаа во која ќе се вложат највеќе пари. Но, писателите најмалку имаат право да се предадат. Во ова време на хиперпродукција на текст, на претежно глупави и бесмислени статии на портали, романсиерот треба да е најблиску до пишувањето на семоќен роман кој како тивка вода ќе помести нешто во општеството. Јас се надевам дека „Диссомнии е таква тивка вода“,
-рече Станојоски.
Унапредувањето на статусот и корпусот на македонскиот јазик е дел од програмата на Рациновите средби.
Манифестацијата започнува утре на Лопушник и ќе продолжи на 14 и 15 јуни во Велес со богата културно-уметничка програма во чии рамки ќе настапат Влатко Стефановски и етногрупата „Љубојна“.
Генерален покровител е компанијата Дрекселмајер, а се организира со поддршка на Министерството за култура.
