2021 година започна интензивно за активностите на ВМРО-ДПМНЕ на меѓународен план. Денеска Потпретседателот на ВМРО-ДПМНЕ Александар Николоски оствари значајна средба со Министерот за надворешни работи на Унгарија Сихарто Питер со кој што ја продолжуваат соработката како продолжение на претходните средби на раководството на ВМРО-ДПМНЕ со раководството на ФИДЕС и унгарската влада во Будимпешта.
Како што информираше Николоски на средбата било разговарано за продлабочување на соработката помеѓу двете сестрински партии во рамки на Европската народна партија, продлабочување на билатералната соработка меѓу Македонија и Унгарија но и за перспективата на интеграциите на Македонија во ЕУ во наредниот период.
Целата информација во врска со средбата меѓу Александар Николоски и Питер Сихарто упатена до јавноста од страна на Николоски ја пренесуваме во продолжение:
“Денес остварив средба со Министерот за надворешни работи на Унгарија Szijjártó Péter. Средбата доаѓа како продолжение на претходната дипломатска посета која што делегација предводена од претседателот на ВМРО-ДПМНЕ г.Мицкоски ја имаше со врвот на Унгарската влада, како и во функција на реализација на заложбите за почеток на преговори на Македонија со ЕУ, интензивирање на соработката на сестринските партии ВМРО-ДПМНЕ и ФИДЕС и продлабочување на односите на Македонија и Унгарија.
На средбата разговаравме за продлабочената соработка и јакнење на капацитетите на двете сестрински партии Фидес и ВМРО-ДПМНЕ во рамките на семејството на Европската Народна партија, како и продолжување на напорите на одблокирање на патот кон Европската Унија. Истакнав дека исклучително важно е да не се губи време со интеграциите на Македонија и од голема помош е секоја поддршка и лобирање на пријателите како што е Унгарија. Високиот степен на корупција, како и неказнетиот криминал кој е потврден и од Транспаренси Интернешнл е сигнал дека Владата на Македонија ги губи своите приоритети, но и дека сето тоа не смее да ја направи државата и граѓаните заложник на неспопособната Влада.
Беше констатирано дека Македонија е време да започне преговори веднаш, а поддршката е сестрана од Унгарија, воедно ваква поддршка Владата треба да побара од сите држави пријатели на Европско тло. Дипломатската турнеја ќе ја продолжам и во Белград каде ќе остварам средба со амбасадорката на Португалија земја претседавач со ЕУ Марија Виргина Пина која ја покрива и Македонија. Воедно ова ќе биде прва средба со политичар од Македонија откако од 1 јануари оваа година Португалија е земја претседавач со Европската Унија.”
