Денеска Претседателот на ВМРО-ДПМНЕ Христијан Мицкоски заедно со Секретарот за меѓународна соработка на ВМРО-ДПМНЕ остварија работен состанок со директорот на Фондацијата “Конрад Аденауер” во Македонија, Јоханес Реј.
На средбата било разговарано за интензивната соработка што партијата ја има со оваа меѓународна фондација како и за претстојните процеси на евро-атланските интеграции на Република Македонија.
Во продолжение во целост го пренесуваме соопштението на Христијан Мицкоски упатено до јавноста во врска со оваа средба:
“Заедно со меѓународниот секретар Тимчо Муцунски / Timco Mucunski oстваривме средба со Јоханес Реј, директор на Фондацијата „Конрад Аденауер“ во Република Македонија.
На средбата разговаравме за соработката на ВМРО-ДПМНЕ со Фондацијата, актуелната политичка состојба во државата, македонската европерспектива и предизвиците со кои се соочуваме, како и за престојните парламентарни избори во Македонија.
Се заблагодарив за досегашната соработка со фондацијата која е на одлично ниво и е од особено значење во периодот пред предвремените парламентарни избори, размената на искуства и знаење во престојниот период е клучна.
Во однос на актуелната политичка ситуација ги посочив поразителните истражувања на „Транспаренси Интернешнл“ за перцепција на корупцијата според која Македонија е на врвот според корупцијата на Балканот како и она на угледниот британски весник „Економист“ кој ја класифицира нашата држава како „хибриден режим“.
Потенцирав дека клучна стратешка определба на ВМРО-ДПМНЕ е членството во Европската Унија, но поради високата корупција и вмешаноста на високи државни и партиски функционери на СДСМ во коруптивни афери се загрозува нашата европска перспектива.
Истакнав дека по победата на 12 април, новата Влада има план како да се справи со овој горлив проблем и има план како да ја стави Македонија на брзата трака за членство во Унијата.
Се согласивме дека првиот и клучен услов за европската иднина на државата се фер и демократски избори на 12 април, волјата на граѓаните мора да се почитува.”
