Потпретседателот на ВМРО-ДПМНЕ Владо Мисајловски денеска на прес конференција ги повика сите слободоумни граѓани да се приклучат на протестот кој што го организира опозициската партија со цел за одбрана на ликот и делото на Гоце Делчев.
Македонскиот револуционер кој претставува камен темелник на Македонската борба за слобода е под удар на негациите во рамки на преговорите кои што власта предводена од Зоран Заев ги реализира со бугарските официјални лица. Дополнително бугарските власти се заканија со вето од страна на Бугарија во пристапувањето на Македонија кон преговори за членство во ЕУ доколку македонската страна не се откаже од овој свој историски лик, на чија што борба се темели постоењето на Македонската современа држава.
Притоа на прес конференцијата Мисајловски ги разобличи намерите на власта да инфилтрира свои луѓе на протестот кој ќе се одржи утре вторник 15.09.2020 година со почеток во 18.30 часот пред Министерството за правда. Намерата на СДСМ и Зоран Заев преку вакви свои продолжени раце од луѓе да го наруши текот на самиот протест со што сакаат да ја дискредитираат опозицијата и нивната борба за пад на актуелната власт.
Во продолжение во целост ја пренесуваме прес конференцијата на Владо Мисајловски:
“Гоце Делчев е еден од најсветлите ликови врз чии постулати почива современата македонска држава. Тој е дел од нашиот идентитет и црвена линија за нашето достоинство. Токму за него и за историски факти далеку од очите на јавноста преговара владата на Заев со нашиот источен сосед. Трговијата со неговото име и постоење значи трговија со нашето постоење и она што сме и ќе продолжиме да бидеме, тоа е Македонци. Во меѓувреме нема никакво поместување на патот кон Европската Унија. Европската Унија останува уште едно неостварено ветување на Зоран Заев и неговата власт. Не чувме идеја, ниту план.
Да потсетиме ова е Влада која е спремна да се откаже од се, само за својата лична спас и спасот на неколку кариери на луѓе кои ја водат.
Се работи за мошне чувствителен период и тоа време кога и им треба нашата поддршка на нашите историчари кои се дел од тимовите за преговори за да ја бранат вистината за Гоце и да не потклекнуваат на трговии и политички притисоци. Затоа, ВМРО ДПМНЕ организира во вторник со почеток во 18:30 часот Протестен собир кој ќе започне од пред Министерството за правда, ќе продолжи преку мостот „Гоце Делчев“ се до зградата на Министерството за надворешни работи. Протест на кој ќе изразиме поддршка за членството во ЕУ, за Македонија и за Гоце Делчев кој е нашето постоење и нашиот идентитет. Делчев се борел за народна слобода и пред се културен и сестран развој што е и основа на европските вредности кон кои ние сите се стремиме. Делчев е ликот кој треба да не обединува, а не да не разединува.
Oва ќе биде мирен народен протест на кој ќе се испратат јасни пораки.
Време е за гласот на тивкото мнозинство. Повикуваме сите да ни се приклучат во протестот кој треба да биде нашиот глас за она што не обележува како држава, стратешки интерес и бедем на нашето постоење.
И сосема на крај, предочуваме дека имаме сознанија за уфрлање на поединци кои се инструирани од власта, кои ќе имаат за цел да го дискредитираат протестот со елементи на говор на омраза и изразување на ставови кои не се дел на партијата, за да подоцна се дискредитира ВМРО ДПМНЕ. Однапред се оградуваме од таквите инструирани сценарија кои само им одат во прилог на структурите на власта кои ја држат државата заробена и не посакуваат напредок. Токму затоа на однапред видно одбележано место пред Министерството за правда ќе се делат пораки и транспаренти кои ќе бидат дел од протестот чија јасна цел ја кажуваме денес. Ве повикуваме сите и се гледаме во вторник во 18:30 часот.”
